الراجل العجوز دخل
تاني يوم ندى وصلت المعرض بدري عن ميعادها بحوالي نص ساعة وكانت طول الطريق مش قادرة تبطل تفكر في الراجل اللي دخل امبارح بملابسه البسيطة وخرج وهو بيتكلم مع حد كأنه صاحب المكان
لكن أول ما دخلت لقت حسام واقف عند الاستقبال وملامحه متوترة بشكل عمرها ما شافته عليه قبل كده
بص لها وقال
إنتي جيتي بدري ليه
ندى ردت
عشان الحاج عبدالسلام قاللي أكون موجودة النهارده
حسام اتغير لون وشه للحظة لكنه حاول يخبي
هو قالك كده
أيوه
حسام سكت وبعدين قال
لما ييجي ابقي بلغيني فورًا
ندى استغربت
هو مش المفروض نتعامل معاه زي أي عميل
حسام بص لها بنظرة حادة
إنتي ما تسأليش كتير يا ندى
قبل ما ترد سمعت صوت عربية بتقف قدام المعرض
الكل بص ناحية الباب
عربية سوداء فخمة دخلت بعدها مباشرة عربية نقل قديمة
نزل منها عبدالسلام
لكن المرة دي ما كانش لوحده
كان معاه راجل في الأربعينات ماسك ملف أسود
عبدالسلام دخل بهدوء
صباح الخير
حسام قرب منه بسرعة
أهلا وسهلا يا حاج عبدالسلام نورتنا
ندى لاحظت التغيير في صوته
نفس الراجل اللي امبارح كان بيضحك عليه بقى فجأة بيتكلم معاه باحترام مبالغ فيه
عبدالسلام بص له وقال
صباح النور
وبعدين لف ناحية ندى
إنتي جاهزة
ندى هزت راسها
أيوه
حسام تدخل بسرعة
أكيد جاهزين يا حاج وهنخلي حضرتك تشوف أفضل العربيات عندنا
عبدالسلام ابتسم
أنا مش جاي أشوف العربيات النهارده
الابتسامة اختفت من على وش حسام
جاي أشوف الحسابات
سكت المكان كله
حسام حاول يضحك
حسابات إيه يا حاج
عبدالسلام أشار للراجل اللي معاه
الأستاذ ياسر من الإدارة المالية
وبعدين قال
عايزين نراجع مبيعات الفرع خلال آخر سنتين
حسام بدأ يتلعثم
بس ليه حضرتك
عبدالسلام قاطعه
لأن اسمي موجود في الأوراق الرسمية للمجموعة
ندى بصت له بدهشة
يعني حضرتك
عبدالسلام قال بهدوء
أنا واحد من مؤسسي الشركة
الكلمة وقعت على المكان كأنها صدمة
الموظفين اللي كانوا بيضحكوا عليه امبارح بقوا واقفين مش عارفين يبصوا في عينيه
