الساعه كام التلاته

وإن محمود اكتشف إن في ورق قديم مرتبط بالقضية دي اتنقل من مخزن لمخزن لحد ما وصل لمكان قريب من بيته

سألته وأنا بحاول أستوعب

طب إيه اللي جوه الدولاب ده

شريف بص ناحية الباب المفتوح وقال

أنا معرفش لسه بس اللي أعرفه إن فؤاد كان عنده بنت اسمها نور اختفت وهي عندها سبع سنين والناس كلها افتكرت إنها ماتت مع أهلها لكن مفيش ج/ثة اتلاقت ليها ولا دليل مؤكد على موتها

في اللحظة دي سمعنا صوت الخبط من جوه الدولاب تاني

تلات خبطات متتالية

وبعدين صوت الطفلة رجع يهمس

ماما

ليلى اللي كانت مستخبية ورايا رفعت راسها وبصت للدولاب وقالت ببراءة

هي البنت دي بتنادي عليكي إنتِ يا ماما ولا أنا اللي سامعة غلط

بصيت لبنتي وأنا حاسة إن الدنيا كلها اتقلبت

وقبل ما أقدر أرد شريف قرب من الدولاب ومد إيده ناحية الرف السفلي وقال

في حاجة هنا إحنا مش واخدين بالنا منها

بدأ يتحسس الخشب لحد ما لقى لوح صغير بيتحرك ضغط عليه فسمعنا صوت طقة وظهر درج رفيع مخبي جوه القاعدة

فتح الدرج وطلع منه كيس قماش قديم

جواه كان فيه مفتاح نحاس صغير وخطاب مطوي وصورة لطفلة لابسة فستان أبيض

قلبت الصورة ولقيت مكتوب على ظهرها تاريخ يرجع لخمسة وعشرين سنة

أما الخطاب فكان مكتوب بخط محمود

فتحت الورقة وبدأت أقرأ بصوت مرتعش

يا سعاد لو إنتِ بتقري الكلام ده يبقى أنا فشلت إني أوصل للحقيقة بنفسي ومش عارف هقدر أحميكي إنتِ والعيال ولا لأ

في حاجات اتقالتلي عن أمي طول عمري وكنت بصدقها من غير ما أسأل لكن من يوم ما عرفت حكاية نور وأنا بدأت أفهم إن في ناس ممكن تدفن الحقيقة سنين طويلة عشان تحافظ على فلوسها

أنا اكتشفت إن نور ممكن تكون لسه عايشة وإن في حد من عيلتنا كان عارف مكانها من البداية

لكن أخطر حاجة إني لقيت مستندات بتثبت إن أملاك عيلة الدمنهوري اتسجلت بأسماء ناس تانية بعد اختفائهم بأيام قليلة

ولو المستندات دي ظهرت ناس كتير هتدخل السجن

وقفت عن القراءة وأنا مش قادرة أتنفس

محمود كان عارف كل ده قبل ما يموت

وكان بيحاول يوصل للحقيقة لوحده من غير ما يقولي أي حاجة عشان يحميني