بقالى عشرة أيام بس
أحمد رفع عينه في الأرض، ومن غير ما يبص في عيني، قال بصوت واطي ومكسور:
— اعتذري لأمي يا ندى.. هاتي راسها وبوسي عليها، وخلينا نعدي اليوم، ومتكبريش الموضوع عشان خاطري.
الكلمة دي قطعت آخر حبل كان رابطني بيه. حسيت إن كل حاجة بنيتها في خيالي اتهدت في ثانية. الراجل اللي كنت رايحة معاه النهاردة أتباهى بيه قدام أمي، طالب مني أبوس راس الست اللي بتهينني وبتسلبني أبسط حقوقي في أول أسبوعين جواز!
رجعت خطوة لورا وقولت بمنتهى الثبات:
— أنا مش هعتذر لحد، لأني مغلطتش. والمفتاح مش هيمشي مع حد، وأنا مش نازلة من هنا إلا ومفتاح شقتي في إيدي. يا إما تفتحولي شقتي أدخل أقعد فيها لحد ما نتفاهم، يا إما تدوني المفتاح ونتحرك. غير كده.. أنا هتصل بوالدي وأخويا، وخليهم هما يتفاهموا مع الرجالة بتوعكم!
كلمة “هتصل بوالدي وأخويا” نزلت عليهم زي البنزين على النار. حماتي شهقت بصوت عالي:
— بتهددينا بأهلك يا بت فلان؟! بقى جاية تكسرينا في بيتنا؟! والله ما هتاخدي المفتاح، والشقة دي مش هتعَتبيها برجلك، وخلينا نشوف أهلك هيعملوا إيه لما ييجوا يلاقوكي مرمية على السلم بهدومك!
حمايا شاور لطارق وحسن:
— نزلوا البت دي تحت! ملكيش وقفة هنا في الأدوار، انزلي استني أهلك في الشارع ولا في مدخل العمارة، وشقتك دي مقفولة، ومحدش هيهوب ناحيتها!
طارق مد إيده عشان يمسك كتفي ويزقني ناحية السلم. في اللحظة دي، جسمي كله اتنشن، وبعدت عنه بقوة وزعقت فيه:
— إيدك متلمسنيش! قسماً بالله لو حد مد إيده عليا لأعملكم محضر هتك عرض وبلطجة في القسم! انت فاهم ولا لأ؟!
أحمد جرى ومسك إيد أخوه وهو مرعوب:
— خلاص يا طارق.. خلاص عشان خاطري متمدش إيدك، اهدوا يا جماعة..
حماتي دخلت في النص وزقت أحمد في صدره:
— ابعد انت يا دلدول! سايب مراتك تتمادى وتغلط في أهلك وإخواتك وانت واقف زي خيال المآتة؟! اطلع انت برة، الحساب معاها هي!
الهرجلة زادت، والأصوات علت، وصوت الزعيق بقى واصل لآخر الشارع، لحد ما فجأة باب الأسانسير اتفتح في الدور بتاعنا.
خرج منه اتنين من الجيران، عم حسين الراجل العجوز اللي ساكن في التالت، ومعه ابنه. بصوا للمنظر بدهشة واستنكار؛ البنت الصغيرة العروسة محشورة في زاوية جنب باب شقتها، وحواليها أربع رجالة وست بتزعق وبتشاور بإيديها.
