انا عمري ما شفت

رد شرف للـ الكاتبة نرمين عادل همام في ليلة فرحي، الموسيقى كانت مالية المكان، والأنوار بتعكس على الميه، لحد ما وقفت حماتي قدامي. كانت بتبص لأبويا بنظرة كلها احتقار وقرف، جابته من فوق لتحت، وبصوت عالي شق دوشة المعازيم قالت: "أنا عمري ما شفت عيلة فقيرة وإيحة بالشكل ده!" صوتها رن في المكان، زي ماكينة كاشير بتقفل على فكة. وقبل ما حد يستوعب هي بتعمل إيه، مدت إيدها وزقت أبويا بكل قوتها ناحية حمام السباحة، وصرخت وهي بتبص له باشمئزاز: "خسارة فيهم إن الأشكال دي تدخل الفرح اللي ابني دافع فيه دم قلبه! ده إحنا عاملينه في فيلا فيها حمام سباحة عشان تبقي عارفة إنتي داخلة على عيلة عاملة إزاي!" أبويا وقع، والميه طرطشت على كل اللي واقفين. أمي صرخت وجريت عليه من غير تفكير، لكن شويكار هانم ما اكتفتش.. مدت إيدها وزقتها هي كمان. وقعت أمي، وفستانها الأزرق البسيط اتنفخ وفرد حواليها فوق الميه. أبويا ظهر جنبها بسرعة، الجاكت بتاع البدلة بقى تقيل وحالته تصعب على الكافر. مد إيده ومسك أمي قبل ما تغطس، وحاول يسندها ويطلعها. أما حماتي؟ وقفت على حافة البسين وفضلت تضحك.. ضحكة عالية، مستفزة، ومريضة. حطت إيدها على مناخيرها وقالت: "يمكن الميه تغسل ريحة الفقر اللي لازقة فيكم!" سمعت شهقات المعازيم حواليا. واحد من الرجالة طلع موبايله وبدأ يصور، وفي ثانية، كذا شاشة موبايل نورت في الضلمة والكل بيصور الفضيحة. وأنا.. كنت متسمرة مكاني، ببص على حسام. الراجل اللي المفروض بعد أقل من عشرين دقيقة همضي على قسيمة جوازي منه. كان واقف على بعد كام خطوة، ماسك كاس الشمبانيا، وباصص عليه كأن اللي في الكاس أهم بكتير من كرامة أبويا وأمي اللي بيغرقوا. بصيت له وقلت بصوت واطي بيرتجف: "قول حاجة يا حسام." شد فكه، وبصلي بتوتر، وقال ببرود: "ياسمين.. بلاش تكبري الموضوع، أمي شكلها شربت من البيرة ال بتتقدم لرجاله العيلة." بصيت له وأنا مش مصدقة وداني. لفتيت ناحية البسين، أمي كانت بتزيح شعرها المبلول من على وشها، وأبويا محاوطها بإيده وبيطمنها. أمي بصتلي وبصوت مكسور قالت: "معلش يا بنتي، متعمليش مشكلة في يوم فرحك." في اللحظة دي بالذات، كل حاجة نورت قدامي. اللي حصل ده ماكانش مجرد إهانة عابرة أو سكرة زايدة، دي كانت الحقيقة اللي كنت بغفل عنها. بقالنا 18 شهر، وشويكار بتبص لأهلي كأنهم حشرات. كانت بتتريق على ورشة أبويا الصغيرة، وكل ما تيجي سيرتها تلوّي بوزها وتقول: "هو لسه شغال في الورشة دي؟". كانت بتضحك على هدوم أمي، ولما بتدخل شقتنا اللي اتربيت فيها، كانت بتمشي على طراطيف صوابعها كأنها خايفة تتلوث. وكل مرة كنت أواجه حسام، كان حافظ نفس الكلمتين: "ماما بس بتحب تحافظ على شكل العيلة.. بعد الجواز هتهدى.. اديها وقت." وأنا فعلًا اديتها وقت.. واديت حسام أعذار لحد ما رصيدي خلص. بس وأنا شايفاه دلوقتي، عاجز حتى يحط الكاس من إيده عشان يرفع عن أهلي الإهانة، فهمت إن الجوازة دي معناها إن شويكار هتفضل تدوس علينا، وحسام هيفضل يطبطب عليها، وأنا المطلوب مني أبلع وأسكت. بس المرة دي.. لأ. مش بعد اللي حصل لأبويا وأمي. مشيت بهدوء تام ناحية المسرح الصغير بتاع الفرقة. الجرسونات كانوا بيجروا يساعدوا أبويا وأمي يطلعوا، وسايبين وراهم مسار ميه على الرخام. طلعت على المسرح، خطفت المايك من الستاند. ششاورت لمهندس الصوت، فالموسيقى وقفت فجأة. الهمهمة سكتت، وكل العيون اتعلقت بيا. قلت بمنتهى الثبات والهدوء: "الجواز ده اتلغى." الصمت بقى تقيل. حسام رفع عينه وبصلي لأول مرة بخضة، وقال وهو بيقرب من المسرح: "ياسمين! بلاش دراما!" بصيت له من فوق لتحت وقلت: "اللي حصل النهارده مش دراما يا حسام.. دي النهاية. وبحلول الصبح، عيلة الدمنهوري نفسها هتبدأ تقع." شويكار ما استحملتش، انفجرت في الضحك وقالت بصوت عالي بيسخر مني قدام الكل: "إنتي؟ إنتي اللي هتوقعي عيلة الدمنهوري؟ دي البنت اللي كانت بتصمملنا كتيبات الجمعيات الخيرية يا جماعة!" وضحكت تاني. لكن أنا ما ضحكتش.. لأن ده بالظبط الفخ اللي أنا نصبتولهُم، وصدقوه. إن كل علاقتي بيهم شوية تصميمات وإعلانات تافهة. إن ماليش أي وزن في أعمال العيلة، وإني مجرد بنت بسيطة غلبانة اتجوزت ابنهم. مديت إيدي تحت طرحة الفرح، طلعت موبايلي، وطلبت رقم محفوظ عندي من سنين للظروف . الرد جه في ثانية: "أيوه يا آنسة ياسمين." قلت بهدوء عسكري: "ابدأوا التحضيرات اللي كنا مجهزينها لاي حد يفكر يأذينا.." سكتت لحظة، وعيني في عين حسام اللي بدأ يقلق، وكملت: "جمّدوا كل التحويلات اللي لسه ما اتنفذتش. راجعوا الحسابات من أول وجديد، كلموا مجلس الإدارة والبنوك.. وكل المستندات اللي اتأكدنا من تزويرها تخرج في معادها لجهات التحقيق." اتسمرت عيون حسام عليا كأنه بيشوفني لأول مرة. أما شويكار.. ضحكتها ماتت على شفايفها. لأول مرة من بداية الليلة، الغرور اتمسح من على وشها وبقى مكانه رعب مش مفهوم. بصيت ورايا ناحية أبويا وأمي. كانوا لسه مبلولين، وبيترعشوا من البرد والكسفة. حسيت بغصة سدت حلقي، وقلت في المايك: "أنا آسفة يا بابا.. وآسفة يا ماما.. آسفة إني خليتكم تستحملوا القرف ده كله عشاني." وفجأة.. كاوتش عربيات بيفرمل بقوة عند البوابة الرئيسية لفت انتباه الكل. البوابة الحديد الكبيرة اتفتحت، ودخلت خمس عربيات سوداء فخمة ورا بعض، وقفوا صف واحد جنب ساحة الفيلا. الأبواب اتفتحت في نفس اللحظة، ونزل منها رجالة وستات لابسين بدل رسمية، ملامحهم صارمة، وفي إيدهم ملفات وأظرف مقفولة. واحد منهم اتجه ناحيتي بخطوات سريعة من غير ما يبص لحد. وقف قدام المسرح وقال بصوت واطي بس مسموع للي قريبين: "آنسة ياسمين، كل حاجة بدأت تتنفذ." سألته: "والحسابات؟" رد بعملية: "اتعمل عليها بلوك، والتراجع بدأ من الدقيقة دي." وش حسام جاب ألوان، وبقى بيبص للرجالة بخوف وقال: "يعني إيه؟ دول مين؟" بصيت له ببرود وقلت: "دول ناس كانوا مستنيين مني إشارة واحدة." شويكار اتقدمت ناحيتي، بس المرة دي ماشيتها كانت مهزوزة، وصوتها فقد رنته المتعجرفة: "إنتي بتكدبي.. إنتي بتلعبي بينا!" ماردتش عليها. واحد من المحامين اللي نزلوا من العربيات فتح ملف في إيده، طلع ورقة رسمية ومدها لشويكار وقال بحسم: "محامي العيلة بتاعتكم اتبلغ من ربع ساعة بقرار التجميد. واتنين من محامينكم طلبوا بالفعل اجتماع طوارئ مع مجلس الإدارة." الورقة وقعت من إيد شويكار. حسام بص لأمه بصدمة، وبعدين بصلي وهو مش مصدق إن دي البنت اللي كان بيكسر بخاطرها من شوية. وأنا كنت واقفة قدامهم.. بهدوء، مرفوعة الراس. لأول مرة من يوم ما دخلت بيت عيلة الدمنهوري، أنا مش خايفة منهم. ولأول مرة.. هما اللي بقوا مرعوبين مني. همهمات المعازيم بدأت تعلى وتملى المكان. الموبايلات لسه مرفوعة بتصور، بس مفيش حد بيضحك خلاص. شويكار كانت متنحة للورقة اللي في إيدها، عينيها بتتحرك على الكلام كأنها بتقرا طلاسم أو لغة مش فاهماها. أما حسام، فقرب مني بسرعة، مسك دراعي وسحبني بعيد عن الناس خطوتين، وقال بصوت واطي ومخنوق: "ياسمين.. مهما كان اللي بيحصل ده، نقدر نصلحه." سحبت دراعي من إيده بمنتهى البرود، وبصيت له في عينه: "كان المفروض تفكر في الإصلاح وأمي بتغرق قدامك." وشه اتخطف، وعينيه هربت مني وراحت ناحية أبويا. كان واقف جنب أمي، خالع جاكت البدلة المبلول ومغطية بيه كتافها عشان يدفيها. ولأول مرة من ساعة ما الليلة دي بدأت، حسيت إن حسام مكسوف من نفسه. لكن قبل ما ينطق بكلمة.. عربية تانية دخلت من بوابة الفيلا. نزلت منها ست في أواخر الأربعينات، لابسة بدلة فورمال رمادي غامق، خطواتها سريعة وواثقة ودايركت ناحيتي. وقفت قدامي وقالت بعملية: "آنسة ياسمين، مجلس الإدارة طلب اجتماع طارئ، ومستنيين موافقتك قبل ما نبدأ في إجراءات الإفصاح النهائي." شويكار ملامحها اتشنجت، وقاطعتها بعصبية وصوت عالي: "موافقتها على إيه؟ وليه مجلس الإدارة محتاج موافقتها هي أصلاً؟" لفيت ناحيتها، وقلت بمنتهى الهدوء: "عشان مجموعة الدمنهوري بقالها سنين شغالة وسط التزامات وديون.. إنتي نفسك متعرفيش حجمها الحقيقي." حسام بصلي كأنه أول مرة يشوفني في حياته، وقال بذهول: "إنتي عرفتي الكلام ده منين؟" سكت لحظة، ورميت القنبلة: "عشان أبويا من ست سنين.. هو اللي أنقذ شركتكم من الإفلاس." وش حسام اتجمد. بص لأبويا، ورجع بصلي وهو مش مستوعب: "أبوكي؟" هزيت راسي: "أيوة." شاورت ناحية أبويا، وبصيت لشويكار: "الورشة الصغيرة اللي كنتي بتتريقي عليها.. ماكانتش مجرد ورشة تصليح. أبويا هو اللي صمم النظام الهندسي اللي اعتمدت عليه أول توسعة كبيرة في شغل عيلتكم." الصمت نزل على المكان كله، فكملت: "أبويا وأمي اتنازلوا وقتها عن جزء كبير من حقوقهم، لأنهم وثقوا في عيلتكم." بصيت لأمي، كانت ساكتة وعينيها في الأرض. شريط ذكريات طويل مر قدامي.. السنين اللي عدت، الحاجات اللي اتحرمنا منها، وحقوقنا اللي اتنهبت. رجعت بصيت لحسام بحسم: "بس عيلتكم ما احترمتش الاتفاق." شويكار الورقة وقعت من إيدها، وقالت بصدمة: "ده مستحيل.." قربت منها خطوة، وقلت لها في وشها: "لأ.. المستحيل الحقيقي، إنك كنتي فاكرة إن الناس اللي أهنتيهم ودُستي عليهم النهارده، ناس غلابة ومالهمش لازمة." في اللحظة دي، موبايلي هز في إيدي. رسالة من المحامي مكتوب فيها: "الملف النهائي اتفتح." رفعت عيني لحسام، الخوف اللي في عينيه كان بينطق. قلت له بهدوء: "الفرح اتلغى الليلة.. لكن عواقب اللي عيلتك عملته، لسه بتبدأ دلوقتي." وفجأة.. الشاشة الكبيرة اللي ورا مسرح الفرح نورت. كل المعازيم لفوا يبصوا. الشاشة رعشت مرتين، وبعدين عرضت أول ورقة. عقد قديم، تاريخه من ست سنين. في آخره توقيع أبويا.. وتوقيع ممثل رسمي من عيلة الدمنهوري، وفوقيهم ختم الشركة. همهمات المعازيم زادت، واحد قرب من الشاشة يقرأ، وواحدة شهقت وقالت: "ده بجد اسم شركة الدمنهوري؟" حسام كان واقف مسمر، عينه على الشاشة، وبعدين بصلي.. كأنه بيحاول يفهم إزاي البنت الهادية اللي كان فاكر إنه هيتجوزها ويسيطر عليها، طلعت هي اللي ماسكة كل الخيوط. كان لازم ارد وبسرعه وقوة وفي نفس المكان والزمان ال اهانت فيه ابويا وامي. ظهرت الصفحة اللي بعدها. تفاصيل حقوق الملكية الفكرية للنظام الهندسي اللي أبويا طوره.. النظام اللي كان السبب في إن مجموعة الدمنهوري تتوسع وتحول شغلها لأرباح بالمليارات. وكان الاتفاق واضح: أبويا له نسبة من الإيرادات، وحق تصويت في الشركات الجديدة. شويكار كانت واقفة مش قادرة تنطق. سنين وهي بتقول على أبويا "بتاع الورشة" و"الصنايعي".. من غير ما تعرف إن ثروة عيلتها كلها مبنية على كتافه. وبعدين ظهرت ورقة تانية بتكشف المبالغ اللي كان المفروض تتدفع لأبويا.. واللي اتدفعت لسنة واحدة بس، وبعدها وقفت. شويكار صرخت بجنون: "ده مزور! جوزي عمره ما يمضي على حاجة زي دي!" بصيت لها ببرود: "جوزك ما مضاش عليها يا شويكار.. أبوكي هو اللي مضى." وشها جاب ألوان وسكتت. حسام قرب من الشاشة، وقال بصوت ضعيف مكسور: "إنتي ليه ماقولتيليش؟" بصيت له كام ثانية، وقلت: "عشان كنت عايزة أعرف حاجة واحدة.. إنت بتحب ياسمين بجد؟ ولا بتحب الصورة اللي كنت راسمها ليا؟ الصورة بتاعة البنت اللي تقدر تتحكم فيها، اللي أهلها غلابة وأبسط من أهلك، وهتفضل دايماً ساكتة وموطية راسها عشان ترضيك؟" بص لكاس الشمبانيا الهانم كانت مشترياها تتفاخر بيها مش مجرد بيرة بس اللي لسه ماسكه في إيده، كأنه لسه واخد باله منه. في اللحظة دي، المحامي قرب مننا وحط ملف تقيل على ترابيزة قريبة، وقال بصوت مسموع: "لسه في حاجة تانية." فتحت الملف، وطلعت شوية إخطارات رسمية رميتها قدامهم: "مجموعة الدمنهوري استخدمت التكنولوجيا دي كضمان لقروض ضخمة من كذا بنك.. والبنوك دلوقتي بدأت تطالب بحقوقها." المكان كله سكت.. سكت لدرجة إني كنت سامعة صوت نقط الميه اللي بتقع من فستان أمي المبلول على رخام الأرضية. شويكار لفت لحسام بانهيار وقالت له: "اتصل بأبوك فوراً!" حسام طلع موبايله وإيده بتترعش. رن.. محدش رد. رن تاني وتالت.. المكالمة بتتحول للبريد الصوتي. وبعد ثواني، موبايله نور برسالة. فتحها، ووشه اتسحب منه الدم. الرسالة من المدير المالي للشركة: "تم عقد اجتماع طارئ لمجلس الإدارة.. واعتباراً من الآن، تم تعليق جميع الصلاحيات التنفيذية لحين انتهاء التحقيق." حسام رفع عينه ليا، مرعوب، وقال بنبرة ترجي: "ياسمين.. أرجوكي.. مهما كنتي فاكرة إني عملته، أنا أقدر أشرحهولك." هزيت راسي برفض: "إنت مش محتاج تشرحلي تصرفات أمك.. إنت محتاج تفسر لنفسك إنت ليه سكت." ماردش.. لأن ماكانش عنده رد. أخيراً.. أمي قربت مننا. كانت لسه مبلولة، وشعرها لازق على وشها، لكنها كانت ماشية بكرامة وهيبة تغطي على أي حد في المكان. وقفت قدامي وقالت بحنية وصوت هادي: "ياسمين.. يلا يا بنتي نروح بيتنا." مسكت إيدها وضغطت عليها وقلت: "حاضر يا أمي." بصيت ناحية حسام وشويكار بصة أخيرة، وقلت: "بس قبل ما نمشي.. في حاجة واحدة لسه لازم أخلصها." ولفيت وبصيت للمعازيم كلهم.. الناس اللي كانوا واقفين متسمرين بيتفرجوا على أبويا وأمي وهما بيتهانوا، عيونهم دلوقتي كلها متعلقة بيا. بصيت لحسام بشكل مباشر، وكسرت الصمت اللي مالي المكان وقلت: "كان المفروض الليلة دي تبقى بداية حياتي مع جوزي.. بس بدل ما تكون البداية، بقت الليلة اللي الحقيقة كلها انكشفت فيها." سكت لحظة، وكملت بنبرة قاطعة: "أنا لا كنت عايزة فلوس عيلتك، ولا طمعانة في شركتكم، ولا حتى كان يهمني أشيل اسمك.. أنا كل اللي كنت عايزاه، إنك تحترم الناس اللي ربوني." المكان كله كان ساكت كأن على روسهم الطير، وفجأة.. الشاشة الكبيرة اللي ورايا اتغيرت للمرة الأخيرة. ظهرت صورة قديمة. صورة من ست سنين، فيها أبويا بيسلم على والد شويكار بعد ما مضوا العقد الأصلي.. والمفاجأة اللي قلبت الموازين، إن شويكار نفسها كانت في الصورة، واقفة ورا أبوها بتضحك وبتبارك! المعازيم انفجروا في همهمات كلها صدمة ودهشة. يعني طول السنين اللي فاتت دي، وكل مرة كانت بتعامل فيها أبويا كأنه نكرة أو مجرد "صنايعي غلبان"، كانت عارفة كويس أوي هو مين ومقامه إيه، وكانت بتمثل ببراعة شيطانية. شويكار حطت إيدها على بوقها برعب كأن روحها بتتسحب منها، وحسام فضل باصص للصورة مبرق، مش قادر يستوعب حجم الكدبة اللي عاش فيها. نزلت من على المسرح ببطء، ومشيت ناحية أمي. حطيت دراعي حوالين كتافها اللي لسه بتترعش من البرد، وقلت لها بهمس حنين: "يلا يا ماما." ورا ظهرنا، كانت عيلة الدمنهوري بتغرق. محاصرين بالمحامين، وأعضاء مجلس الإدارة، والمراجعين، وفي ناس ببدل رسمية تبع الجهات المختصة بدأت تدخل الفيلا. ما كلفتش نفسي حتى أبص ورايا. فضلت ماشية بخطوات ثابته لحد ما وصلت للبوابة الخروج. وقبل ما أعدي الباب.. سمعت صوت حسام بيشق دوشة الناس وبيناديني بوجع: "ياسمين!" وقفت لحظة.. بس ما لفتش. ناداني تاني وصوته بيتهدج: "ياسمين!" كملت مشي للشارع، وقفلنا وراينا الباب. كنت فاكرة إن الحكاية انتهت وخلصت عند كده. لكن كنت غلطانة. اللي حصل في ليلة فرحي ماكانش النهاية.. ده كان يا دوب رصاصة البداية. قبل شروق الشمس بوقت قليل، هدوء أوضتي اتكسر على صوت رنة موبايلي. فتحت عيني بصعوبة، سحبت التليفون ورديت وأنا لسه بين النوم والصحيان: "ألو؟" الصوت اللي جه من الناحية التانية طيّر النوم من عيني وخلاني أنطر من على السرير أقعد: "آنسة ياسمين، ركزي معايا واسمعيني كويس." كان صوت الأستاذ سامح. أقدم محامي أعمال في عيلتنا، والراجل اللي أبويا بيثق فيه أكتر من أي حد. بس المرة دي، نبرته كانت غريبة.. كان بيتكلم بسرعة وأنفاسه متقطعة كأنه بيجري. قال: "في محاولة سحب غير مصرح بيها حصلت من حوالي عشر دقايق." قلبي دق بسرعة، وسألته: "سحب إيه؟" قال بصوت مكتوم: "من الحساب الخاص.. الحساب اللي أبوكي مخبيه من سنين." سكت لحظة يبل ريقه، وكمل: "واللي حاول يعمل العملية، استخدم مفتاح التفويض الرئيسي القديم.. اللي كان باسم والد حسام." اتعدلت أكتر في قعدتي، وقلت بذهول: "أبو حسام؟ بس إزاي! امتيازات شويكار التنفيذية اتجمدت من امبارح، ومحدش يقدر..." قاطعني بحسم: "مش شويكار يا ياسمين.. والد حسام نفسه." اتنفست ببطء وأنا بحاول أستوعب: "يعني إيه؟" رد بصوت تقيل مرعب: "والد حسام رجع." الكلمة نزلت عليا زي التلج. أبو حسام مختفي بقاله شهور، وكل اللي بيتقال في العيلة وفي السوق إنه مسافر بره بيتعالج وحالته متأخرة ومبعد عن الشغل. لكن ظهوره المفاجئ في اللحظة دي.. وبمحاولة سحب من حساب سري، كان معناه إن اللعبة لسه ماخلصتش، وإن اللي جاي أخطر. قمت من السرير وخرجت من الأوضة براحة. النور كان لسه مزرق في الصالة. دخلت المطبخ.. لقيت أبويا هناك. كان لابس جلابية البيت، وواقف بيصب كوبايتين قهوة ريحتهم مالية المكان. حط واحدة قدامي، وبصلي بهدوء غريب وقال: "سمعتي من الأستاذ سامح، صح؟" بصيت له باستغراب: "أيوة يا بابا.. بس هو في حساب إيه أصلاً اللي أنا معرفش عنه حاجة ده؟" أبويا ماردش. ساب القهوة، وراح ناحية دولاب خزين قديم في المطبخ، فتح درفته، وطلع من ورا خالص صندوق خشب صغير قشرته مقشرة. حطه على ترابيزة السفرة الصغيره، وقعد يفتح أقفاله النحاسية المصادية واحدة واحدة. الصندوق اتفتح.. وبمجرد ما شفت اللي جواه، لساني اتربط. رسومات هندسية قديمة، ورقها مصفر، مرسومة بخط إيد أبويا. شهادات براءات اختراع. عقود ملكية قديمة، ودفاتر حسابات متآكلة من الأطراف. مسكت دفتر منهم بفتحه، لقيت تاريخه من أكتر من خمسة وعشرين سنة. رفعت عيني لأبويا بصدمة: "إيه ده يا بابا؟" اتنهد تنهيدة شالت هموم سنين، وقال: "قبل ما عيلة الدمنهوري يبقى عندها كل العز والنفوذ ده.. أنا ووالد حسام كنا شركا." اتجمدت مكاني كأن حد كب عليا ميه ساقعة: "شركا؟" هز راسه وأشار للورق المفرود قدامي: "أيوة. إحنا اللي بدأنا كل حاجة من الصفر." فضلت أقلب في الأوراق وإيدي بتترعش. كل براءة اختراع، كل تصميم تقيل، اسم أبويا كان منور فيه كأساس. بصيت له وقلت: "يعني كل اللي بنوه ده كان معتمد على شغلك؟" أبويا هز راسه وقال بمرارة: "مش كله.. لكن الأساس والعصب كان شغلي أنا، وإدارته هو." بصيت في الأوراق، وفي ثانية، كل حاجة ربطت في دماغي. شهقت وقولت: "يبقى والد حسام ما استولاش على حقوقك من ست سنين بس في التوسعة الأخيرة.. ده بنى إمبراطورية عيلته كلها على شقاك وأبحاثك من البداية!" سكت شوية، عينيه سرحت في الماضي وقال: "كان بينا حساب أمان اتأسس من تلاتين سنة. الحساب ده كان جواه نسبة كبيرة من حقوق التصويت والأسهم اللي تضمن حقي، وكل ده كان تحت إدارة صندوق أمان مستقل عشان محدش يقدر يلعب فيه." سألته وأنا حاسة بقهرة: "طب إزاي قدر ياخد كل ده؟" أبويا ضحك ضحكة قصيرة مكسورة: "لعبها صح. أسس شركات وهمية بأسماء ناس تبعه، وبدأ يسرب الملكيات ويحولها واحدة واحدة من ورايا، وبعدين جابني وقنعني إن المشروع فشل وبيصفي، وإن مفيش فايدة." صوتي علي غصب عني من الوجع: "وإنت سكت؟ إزاي تسكت على كل ده؟" فضل ساكت فترة طالت، وبعدين بصللي بعينين مليانة عجز وقال: "كان مهددني." اتخضيت: "مهددك بإيه؟" رفع عينه ناحية باب المطبخ. أمي كانت واقفة مسندة على الحيطة وبتسمعنا. قال بصوت مهزوز: "هددني إنه يدمر مستقبل أمك وشغلها وسمعتها.. ووقتها هو كان عنده نفوذ وعلاقات توديني أنا وهي ورا الشمس. فاخترت أمك.. واخترتك." حسيت بوجع بيعصر قلبي. سنين.. سنين وأبويا راضي يعيش حياة بسيطة، يفتح ورشته كل يوم الصبح، ويرضى بالقليل، وهو أصلًا الشريك المؤسس في الثروة اللي عيلة الدمنهوري عايشة فيها وبتبص لنا منها من فوق. أمي قربت منه بخطوات تقيلة، حطت إيدها على كتفه بحنية سندت ظهره المنحني، وقالت لي بصوت دافي بس موجوع: "إحنا سكتنا عشان نحميكي إنتي يا ياسمين، وعشان نعيش في أمان بعيد عن شرهم. لكن امبارح.. لما شفناهم بيدوسوا علينا، وبيعاملوا أبوكي كأنه شحات أو حشرة في فرح بنته..." سكتت، ودمعة لمعت في عينيها ونزلت على خدها: "قلبي اتكسر." وقبل ما أقدر أنطق بكلمة أواسيهم بيها.. موبايلي رن تاني. المرة دي كانت مكالمة فيديو. بصيت للشاشة، والاسم ظهر قدامي: "حسام". أخدت نفس طويل ماليته بكل القوة اللي جوايا، وضغطت قبول. صورة حسام ظهرت. كان قاعد في الكرسي اللي ورا في عربيته، متبهدل. البدلة الشيك اللي كان لابسها امبارح اختفت، وكان لابس قميص مكرمش مفتوح زرايره، شعره منكوش، ووشه شاحب وعينيه مليانة رعب وضياع. أول ما شافني، قال بلهفة وصوت مكسور: "ياسمين.. أبوس إيدك ما تقفليش." سكت يبل ريقه، وكمل بانهيار: "أمي قافلة على نفسها في أوضتها من امبارح بتصوت.. ومجلس الإدارة منعني أدخل الشركة وعملولي بلوك من كل السيستم.. أنا مش عارف أعمل إيه، الدنيا بتتهد فوق دماغي." بصيت له ببرود ثلجي، ملامحي ماتحركتش فيها شعرة. سيبته يخلص كلامه، وبعدين قلت بهدوء قاتل: "إنت اللي اخترت يا حسام." قربت الموبايل من وشي عشان يشوف نظرة عيني كويس، وكملت: "اخترت تقف تتفرج جنب حمام السباحة.. اخترت تفضل ماسك كوباية الشمبانيا بتاعتك خايف عليها تتدلق.." بصيت في عينيه مباشرة وختمت كلامي: "وإنت شايف أمك بتعتدي على أبويا بوقاحة." حسام نزل عينه في الأرض، وشه اتعصر، وماقدرش ينطق حرف. وأنا.. لأول مرة من يوم ما عرفته، بصيت له ومحستش ذرة شفقة واحدة ناحيته. حسام صوته كان متقطع وبيترعش:.....يتبع للجزء الثانى والاخير حسام صوته كان متقطع وبيترعش: "ياسمين، أنا كنت خايف!" بصيت له في الشاشة من غير ما أنطق بحرف. كمل بسرعة ولهفة: "إنتي مش عارفة أبويا ممكن يعمل إيه.. هو وصل الشركة من ساعة تقريباً، وهايج على الكل." قلت له ببرود وثبات: "لو أبوك ناوي يفرد دراعه على فريقنا القانوني، خليه يروح يقابل الأستاذ سامح قدام النيابة والمحكمة." اتوتر أكتر، وقرب الموبايل من وشه كأنه بيوشوشني: "ياسمين استني! أبويا بيحاول يسحب الفلوس من الحسابات اللي بره مصر.. بيقول لو إحنا وقعنا، هيحرق الأخضر واليابس." رديت بمنتهى القوة: "مش هيطول يحرق قشاية.. لأن الفلوس والأصول دي مش بتاعته من الأساس، ومش من حقه يدمر حاجة هو سارقها." وقفلت السكة في وشه، من غير ما أستنى أسمع منه نفس كمان. بعد حوالي تلت ساعة، جرس الباب رن. كان الأستاذ سامح، ومعاه اتنين محاسبين تقال متخصصين في قضايا الفساد المالي، ومندوب قضائي شايل ملف متضخم بأوامر المحكمة. سامح حط شنطته التقيلة على ترابيزة المطبخ، وبصلنا بانتصار: "محاولة السحب فشلت." بصيت له بلهفة، فكمل: "البنك طلب تأكيد إضافي للهوية والتوقيع، فالعملية اتعمل عليها بلوك فوري." اتنفست براحة وسألته: "قدرنا نجمّد أصوله جوه مصر قبل ما يحاول يهربها؟" ابتسم ابتسامة واسعة وقال: "القاضي مضى بالفعل على أمر تحفظ مؤقت.. يعني أي أصول باسم عيلة الدمنهوري، سواء حسابات أو عقارات، مقفول عليها بالضبة والمفتاح وممنوع التصرف فيها لحد ما التحقيق يخلص." لف وبص لأبويا وقال بحسم: "دلوقتي فاضل خطوة واحدة يا أستاذ عبد الله.. إنك تقف قدام المحكمة وتطالب بحقك." أبويا بص للورق. إيديه الخشنة اللي شقيت سنين كانت بتترعش بخفة وهو بيلمس شهادات الأسهم القديمة. قال بصوت واطي وموجوع: "أنا قضيت تلاتين سنة غاطس في الشحم وتصليح المواتير.. عمري ما كنت طمعان أقعد في برج قزاز وسط حيتان بتاكل في بعضها." قربت منه، مسكت إيده وقلت له: "إنت مش بتعمل ده عشان البرج يا بابا.. إنت بتعمله عشان الحيتان دي تعرف إن مش من حقهم يدوسوا على كرامة الناس لمجرد إن معاهم فلوس." أمي قربت منه، وباست خده بحنية. جابت له بدلته الكحلي اللي كانت كاوياها ومجهزاها، حطتها قدامه وقالت بابتسامة تشق القلب: "قوم البس يا عبد الله.. كفاية عليك تستخبى لحد كده. الأوان جه إن البلد كلها تعرف مين اللي حط الأساس الحقيقي لشركة الدمنهوري." الساعة كانت تمانية ونص الصبح. وصلنا قدام مجمع المحاكم في القاهرة. المكان كان مقلوب صحفيين ومصورين وكاميرات. فضيحة الفرح كانت ولعت في البلد كلها من بالليل، والفيديو بتاع شويكار وهي بتزق أبويا في البسين كان تريند على كل منصات السوشيال ميديا. أول ما نزلنا من العربيات، المايكات اتمدت في وشنا زي المطر: "يا أستاذ عبد الله، هل فعلًا كنت شريك في مجموعة الدمنهوري؟" "يا أنسة ياسمين، الكلام عن المليارات المنهوبة ده حقيقي؟" "هل عيلة الدمنهوري نصبت على والدك؟" فلاشات الكاميرات كانت بتعمي العين، بس أنا فضلت رافعة راسي، ساندة أبويا، وما رديناش على نص سؤال. شقينا طريقنا ودخلنا مبنى المحكمة. جوه القاعة الامور المستعجلة ، والد حسام كان قاعد في مكانه. راجل في أوائل الستينات، أنيق جداً، شعره متسرح بعناية، بس عينيه فيها قسوة وشر تخلي أي حد يتوتر وهو باصصلها. جنبه شويكار، متدارية ورا بالطو غالي ونضارة شمس ضخمة رغم إننا جوه قاعة مقفولة، بس إيديها اللي بتترعش كانت فضحاها. حسام كان قاعد وراهم في آخر صف، باصص للأرض، ومش قادر يرفع عينه في عيني لحظة واحدة. والد حسام مال بجسمه ناحية أبويا، ومن بين سنانه قال بنبرة فحيح كلها تهديد: "كان أكرم لك تفضل مدفون في ورشتك يا عبد الله.. إنت مش هتطول مني جنيه أحمر." أبويا بصله بهدوء وثبات تام، وماردش الإساءة، بس قاله كلمة واحدة: "أنا مش جاي ألم فلوس.. أنا جاي أرجع الحق لأصحابه." والد حسام جز على سنانه بغل، وفي اللحظة دي، حاجب المحكمة نادى. الكل وقف. دخلت هيئة المحكمة والقاضية قعدت مكانها. وبعد ما الكل قعد، القاضية قالت بصرامة: "الجلسة منعقدة للنظر في الشق المستعجل بخصوص نزاع ملكية حقوق فكرية وتجارية، وادعاءات بتزوير وإخفاء مستندات وتلاعب في أصول مجموعة الدمنهوري." الأستاذ سامح وقف فوراً وقال بثقة: "سيادة المستشار، دفاع المدعي بيقدم لعدالتكم دفاتر حسابات أصلية، ومستندات ملكية، وملفات براءات اختراع قديمة تثبت إن موكلي، السيد عبد الله، هو صاحب النصيب الأكبر في الأصول محل النزاع." محامي الخصم نط من مكانه: "اعتراض يا فندم! المستندات دي مر عليها عشرات السنين، وأي مطالبات مالية بيها سقطت بالتقادم المانع لسماع الدعوى!" القاضية بصت له بحدة وقالت: "التقادم لا يحمي إخفاء الحقوق والتلاعب بالمستندات بسوء نية.. خصوصاً لو ثبت وجود تزوير جنائي متعمد." المحامي سكت وبلع ريقه. والد حسام بصله بعصبية ومسك في طرف الترابيزة بإيده. الأستاذ سامح فتح ملف أزرق، وطلع منه ورقة وحطها قدام القاضية: "وده يا فندم مستند أخطر." القاضية بصت في الورقة، ورفعت عينيها: "المستند ده مقدم من إمتى؟ وإيه مضمونه؟" سامح رمى القنبلة في القاعة: "من حوالي تمانية وعشرين سنة يا فندم.. وهو إعلان رسمي بوفاة السيد عبد الله قانونياً خارج البلاد. استخرجه المدعى عليه عشان يستولى على كامل الحصص." همهمة زلزلت القاعة. شويكار شهقت بصوت عالي وبصت لجوزها برعب. حسام رفع راسه لأول مرة، ملامحه كانت بتنطق بالصدمة، صرخ في أبوه من غير ما يحس: "إنت أعلنت وفاة شريكك؟ عملت كده إزاي؟!" أبوه لف له وزعق فيه بجنون: "اخرس! إنت حتة عيل متعرفش حاجة عن إزاي الكيانات دي بتتبني!" حسام رجع لورا مذهول، والقاضية خبطت بالمطرقة بعنف: "هدوء في القاعة! أي تجاوز أو إخلال بالنظام هأمر بحبس المتسبب فوراً وإعتباره إهانة للمحكمة." القاعة سكتت كأن على روسهم الطير، والقاضية شاورت لسامح: "كمل." الساعتين اللي بعدهم عدوا كأنهم دهر. فريق المراجعين بتوعنا فتحوا الدفاتر القديمة وقدموا مستند ورا مستند. تحويلات مشبوهة، شركات وهمية، ملكية اختراعات متزورة، وعقود استحواذ. كل خيط كان في النهاية بيتربط باسم أبويا. تلاتين سنة من التلاعب المالي والنصب المقنن اتعرت قدام المحكمة ورقة ورقة. حتى الفيلات والقصور اللي عيلة الدمنهوري كانت بتتنطط بيها علينا وبتذلنا بيها، طلعت مبنية من دم وشقا راجل عاش عمره في ورشة. وفي النهاية، لما المحاسبين قدموا التقرير المبدئي بإجمالي الأصول المنهوبة والتعويضات والفوائد القانونية، الرقم خلى القاعة كلها تكتم أنفاسها. أكتر من أربعة مليار جنيه. محامي عيلة الدمنهوري الكبير، اللي كان داخل القاعة نافش ريشه، مال ناحية والد حسام وبدأ يهمس له بسرعة وتوتر. ملامحه كانت بتنطق بالهزيمة المطلقة، الورق ضده بالكامل ومفيش أي مخرج. وقف المحامي ببطء، كتافه كانت متهدلة، صوته كان مهزوز ومتردد وهو بيقول: "سيادة المستشار..." سكت لحظة.. وبص ناحية موكله، كأنه لأول مرة في تاريخه المهني.. مش لاقي كدبة تنجد العميل بتاعه ولا مبرر ينقذه من السجن. "سيادة المستشار..." المحامي اتلجلج وهو بيقوم من مكانه، صوته كان طالع بالعافية، "موكلي بيطلب تأجيل الجلسة لمدة ربع ساعة بس.. عشان نقدر نتناقش في شروط تسوية فورية ترضي جميع الأطراف بعيد عن ساحة المحكمة." وقفت أنا فوراً، وبصيت للمنصة بثبات وقلت بصوت مسموع للقاعة كلها: "مفيش أي تسويات في السر يا فندم. عيلة الدمنهوري لازم تتحاسب قدام الناس، وكل مليم يرجع بشفافية ومن غير أي اتفاقات غرف مغلقة." والد حسام فقد أعصابه، بصلي بنظرة كلها غل وكراهية، ونسي إنه قدام قاضي وقال بعصبية: "إنتي حتة عيلة صغيرة ومغرورة! فاكرة نفسك هتقدري تديري كيان زي مجموعة الدمنهوري؟ إنتي آخرك تصممي شوية كتيبات وتعملي إعلانات لجمعيات خيرية!" قبل ما أرد، الأستاذ سامح ابتسم بهدوء وقال بصوت واثق: "ياسمين مش مجرد مصممة زي ما حضرتك اتوهمت. ياسمين خريجة حقوق بتقدير من الأوائل، ودرست قانون شركات وتمويل بشكل متخصص، وهي اللي راجعت كل العقود وجمعت كل المستندات دي بنفسها.. وهي اختارت تخفي ده عن حسام وعيلتكم طول الفترة اللي فاتت عشان تقدر توصل للحظة دي." حسام بصللي مبهوت.. كأنه بيشوفني لأول مرة في حياته. البنت الهادية، الغلبانة، اللي كان فاكرها عجينة طرية في إيده، واللي كان متأكد إنها هتبلع إهانة أهاليها وتسكت عشان ترضيه وترضي كبرياء أمه.. البنت دي طلعت سراب. دي كانت ياسمين الحقيقية اللي أسقطت إمبراطوريتهم. القاضية راجعت آخر تقرير مالي قدمناه، قلبت في المستندات بحسم، وبعدها رفعت عينيها ناحية طاولة الدفاع وقالت بنبرة قاطعة: "قرار المحكمة واضح، بناءً على الشق المستعجل." سكتت لحظة، والكل كتم أنفاسه، وكملت: "أولاً: يتم التحفظ الفوري على كافة أصول وشركات مجموعة الدمنهوري لحين انتهاء التحقيقات الجنائية. ثانياً: منع المدعى عليه من التصرف في أي أموال أو ممتلكات محل النزاع، مع إلزامه بتسليم جواز سفره للجهات المختصة فوراً لمنعه من السفر." شويكار شهقت بصوت عالي وحطت إيدها على قلبها. حسام فضل متسمر في مكانه، وشه أبيض زي الشمع، وعينه في الأرض. كملت القاضية: "ثالثاً: بناءً على المستندات الأصلية، يثبت بصفة مبدئية حق المدعي، السيد عبد الله، في نسبة 51% من الأسهم والحقوق المرتبطة بالأصول، وتنتقل له بموجب هذا الأمر الحقوق الإدارية والتنفيذية المترتبة على هذه النسبة لضمان سير العمل بالشركات." أمي غطت بوقها بإيديها وهي بتبكي من الفرحة المكتومة والصدمة. أما شويكار.. فكانت قاعدة مكانها ميتة إكلينيكياً، كأن الأرض اتخسفت بيها. الإمبراطورية اللي استخدمتها سنين عشان تدوس على كرامة خلق الله وتتعالى عليهم.. بتتهد فوق دماغها في دقايق معدودة. وفجأة، الباب الخلفي للقاعة اتفتح، ودخل ضباط شرطة ببدل رسمية، واتجهوا مباشرة ناحية والد حسام. واحد منهم قال بصوت رسمي حاسم: "مطلوب القبض على حضرتك تنفيذاً لقرار النيابة في البلاغات المقدمة ضدك، بتهم التزوير، التلاعب في مستندات ملكية، الاستيلاء على أموال الغير، والإدلاء ببيانات كاذبة لجهات رسمية." صوت الكلبشات الحديد وهي بتتقفل على معصم والد حسام رن في قاعة المحكمة كأنه جرس نهاية المسرحية. الراجل اللي كان من ساعة واحدة بيهددنا.. مشي معاهم ناحية الباب الجانبي، رافع راسه بكبرياء كداب، بس عيونه كانت فاضية ومكسورة. ما بصش لشويكار.. ولا حتى رمى نظرة لابنه. حسام خرج يجري ورا أمه من باب القاعة الرئيسي. شويكار كانت منهارة، بتعيط وتلطم، وبتحاول تداري وشها بشنطتها من فلاشات الكاميرات والصحفيين اللي متكدسين على سلالم المحكمة. لحقته بره عند العمدان الرخام. أول ما شافني، وقف. عينيه كانت مليانة دموع، صوته كان مكسور ومذلول وقال: "ياسمين.. أرجوكي اسمعيني، والله ما كنت أعرف إن أبويا عمل كل ده في عيلتكم!" بصيتله من فوق لتحت ببرود، وقولتله: "يمكن مكنتش تعرف تلاعب أبوك، يا حسام.. بس كنت عارف كويس أوي قذارة أمك وتعاليها على أهلي. كنت بتشوف كل ده بعينك، وتسكت وتطبطب عليها." رد بسرعة وانهيار: "كنت بحاول أحافظ على البيت.. كنت بحاول أشتري الهدوء! أنا كنت بحبك يا ياسمين.. كان ممكن نبدأ حياتنا بعيد عن القرف ده كله!" بصيتله شوية، وابتسمت بسخرية موجعة: "الحب بيخلينا نحمي اللي بنحبهم يا حسام.. يوم ما أبويا وأمي كانوا بيتحدفوا في البسين وبيتهانوا قدام عينيك.. إنت اخترت تحمي بريستيج عيلتك وكاس الشمبانيا بتاعك." دموعه نزلت على خده بضعف، وقال بيأس: "طب أعمل إيه دلوقتي؟ كل حاجة راحت.. كل حاجة." قلتله من غير أي ذرة شماتة، بس بحسم قاطع: "دور على شغل يا حسام.. وانزل اكسب قرشك بالحلال مرة واحدة في حياتك.. زي ما أبويا عاش تلاتين سنة بياكلها بعرق جبينه من غير ما يمد إيده لحد." سيبته واقف مكانه مشلول، ونزلت سلالم المحكمة إيدي في إيد أبويا، وسط الأستاذ سامح وفريقنا، والمايكات حوالينا من كل حتة. بس المرة دي.. ماكنتش بهرب. كل حاجة بانت، وكل واحد رجع لحجمه الطبيعي. بعد الضهر في نفس اليوم، عربياتنا وقفت قدام مقر المجموعة الرئيسي. أول ما دخلنا من البوابة، أفراد الأمن اللي كانوا زمان بيطردونا لو قربنا، وقفوا انتباه وفتحوا الطريق لأبويا باحترام. ركبنا الأسانسير الخاص لغرفة اجتماعات مجلس الإدارة في الدور الأخير. أعضاء المجلس والمديرين كانوا مجتمعين ومستنيين. الغرفة كانت هادية كأن فيها عزا. واجهات قزاز بتكشف القاهرة كلها، ترابيزة اجتماعات فخمة، وحواليها حيتان السوق.. كلهم دلوقتي قاعدين بيترعشوا ومستنيين مصيرهم. أبويا دخل بخطوات هادية، ثابتة. مشي بطول الترابيزة لحد ما وصل لكرسي رئيس مجلس الإدارة.. الكرسي اللي والد حسام كان قاعد عليه عشرين سنة بيحكم منه إمبراطوريته المسروقة. أبويا قعد. بص في وشوشهم واحد واحد. بعضهم كان عارف جزء من السر وساكت، والبعض التاني مرعوب على منصبه. ولا واحد قدر يحط عينه في عين أبويا. قال أبويا بصوته الأجش الدافي: "يا جماعة.. من النهارده، الكيان ده هيرجع للأساس اللي اتخلق عشانه من تلاتين سنة." سكت لحظة وكمل: "شغل نضيف، هندسة بضمير، وابتكار.. من غير سرقة وتزوير لحقوق الناس." واحد من المديرين التنفيذيين سأل برعب وتلعثم: "طب.. طب واسم الشركة يا أستاذ عبد الله؟ السوق واقع ومصدوم، واسم مجموعة الدمنهوري متسجل في كل العقود والمناقصات." أبويا بصله بثبات وقال: "مجموعة الدمنهوري ماتت وشبعت موت بالشكل اللي كانت عليه." الكل كتم نفسه، فأبويا كمل: "من النهارده، الكيان ده هيشتغل باسم جديد.. (دمنهوري تكنولوجي)." الغرفة فضلت ساكتة ثواني بتستوعب الصدمة، وبعدين بدأ أعضاء المجلس يرفعوا إيديهم بالموافقة واحد ورا التاني، لحد ما القرار صدر بالإجماع. في أقل من ساعة، الإجراءات الرسمية بدأت تتنفذ لتغيير الإدارة والاسم، وكل البنوك والشركاء اتبلغوا إن الشغل أخيراً.. رجع لأصحابه. بالليل، رجعنا بيتنا القديم في حتتنا الهادية. أبويا وأمي رفضوا رفض قاطع ينقلوا أي فيلا من ڤيلات الشركة اللي اتحجز عليها، وفضلوا بيتهم اللي لمهم سنين وسترهم. قعدنا في البلكونة. الهوا كان بيرد الروح، وأمي جابت صينية الشاي بالنعناع وحطتها قدامنا. وشها كان منور براحة وفرحة ما شفتهاش فيها من سنين طويلة. أبويا بص لإيديه الخشنة من الشغل، وابتسم ابتسامة صافية وقال: "الدنيا دي غريبة أوي يا بنتي." ضحكت وسألته: "غريبة إزاي يا بابا؟" قال: "قضيت عمري كله أصلح مواتير في ورشة.. وفجأة، بين يوم وليلة، ألاقي نفسي رئيس مجلس إدارة نص إمبراطورية في السوق." ميلت راسي على كتفه وقولتله بحنية: "إنت مابقتش صاحبها فجأة يا بابا.. إنت بس رجعت أخدت حقك اللي كان بتاعك من يوم ما بدأته." أمي ابتسمت، وطبطبت على شعري وقالت: "طب وإنتي يا ياسمين؟ ناوية على إيه الأيام الجاية؟" سكتت شوية، فأمي حبت تفك الجو وقالت بضحكة خفيفة: "على فكرة، الأستاذ سامح كلمني.. شويكار هانم كلمته النهارده بتعيط وتترجاه يصرفلها أي مبلغ شهري تعيش منه عشان حساباتها كلها اتجمدت." ضحكت بصوت عالي: "بجد؟" أمي سألت: "هتعملي إيه؟" بصيتلهم هما الاتنين، وقلت بهدوء: "هوافق." أمي برقت: "هتوافقي؟" ابتسمت وقولت: "آه.. هعملها راتب شهري يعيشها عيشة كريمة. بس بشرط واحد." "شرط إيه؟" بصيت قدامي وقولت بحسم: "تعتذرلكم.. اعتذار علني، ومكتوب، قدام كل الناس اللي أهانتكم قدامهم يوم الفرح، وتنشر ده في الجرايد." ولأول مرة من يوم الفرح المشئوم، حسيت إن صدري خف، كأن جبل انزاح من عليه. بس اللي ماكنتش أعرفه وقتها في الليلة الهادية دي... إن اعتذار شويكار ماكانش نهاية المطاف، ولا آخر مفاجأة في القصة. لأن تاني يوم الصبح.. شخص جديد هيظهر. شخص أنا كنت فاكرة إن حكايتي معاه ماتت واندفنت من سنين.. في صباح اليوم التالي، البلد كلها صحيت على زلزال. اعتذار شويكار هانم، بخط إيدها وتوقيعها، كان واخد مساحة في الصفحة الأولى من أكبر الجرايد والمواقع الإخبارية. اعتذار صريح مافيهوش أي تلاعب بالكلام؛ اعترفت فيه إنها اعتدت على أبويا وأمي ليلة فرحي من غير أي مبرر، والأهم.. إنها اعترفت بحق أبويا الحقيقي في المجموعة، وبإن السنين اللي عاشوها في العز والرفاهية كانت مبنية على حقوق مش بتاعتهم. الفضيحة كانت مجلجلة. لكن بالنسبة لي، دي ماكانتش أهم حاجة. الأهم إن الحق رجع لأصحابه والكدبة انتهت. بعد ما اتسحبت الفيلات والعربيات، وكل العز اللي كانوا بيتعالوا بيه على الناس، شويكار وحسام اتنقلوا لشقة إيجار بسيطة في حي هادي ومستخبي، بعيد عن مجتمعهم المخملي القديم اللي اتبرأ منهم أول ما فلسوا. ولأول مرة في حياته، حسام اضطر ينزل يشتغل المرمطة. اشتغل مندوب مبيعات مبتدئ في معرض سيارات. بقى يصحى الصبح بدري، يتشعبط في المواصلات، يقف على رجله بالساعات يقنع العملاء، ويرجع آخر اليوم مهدود. الشغلانة اللي كان زمان بيعتبرها "شغل ناس أقل منه"، الدنيا أجبرته يعيشها ويشوفها على حقيقتها. بعد تلات شهور من الكسرة دي، بعتلي رسالة طويلة على الموبايل. كان بيعتذر فيها عن جبنه.. اعترف إنه سكت كتير، وإنه خسرني عشان كان خايف من أمه ومتربي على إنه يفضل في ضل عيلته. ختم كلامه بإن خسارتي كانت أكبر فشل في حياته. قريت الرسالة مرة واحدة بتركيز.. وبعدين قفلت الشاشة وحطيت الموبايل في الدرج. ماردتش. لأن في سكك، مهما حاولنا نرجع نرصفها، ما ينفعش نمشي فيها تاني. عدت سنتين. سنتين، و"دمنهوري تكنولوجي" بقت كيان تاني خالص. قررنا نخصص جزء كبير من الأرباح يرجع للبلد والناس. عملنا منح دراسية لطلبة الهندسة، دعمنا مدارس التعليم الفني، وفتحنا برامج تدريب للشباب اللي مش لاقيين فرصة يبدأوا بيها حياتهم. أبويا، بدل ما يقعد في مكتب فخم متكيف طول اليوم، كان بيقضي معظم نهاره في معامل الابتكار الخاصة بالشركة. تلاقيه قاعد وسط المهندسين الشباب، بيتناقش معاهم، وبيصلح المواتير والماكينات بإيده المليانة شحم زي زمان. وفضل مُصر يلبس قميصه الكاروهات الفلانيل القديم تحت الجاكت بتاعه، وكل ما أقوله يغيره، يضحك ويقولي: "أنا كده مرتاح، هو اللبس هيغير اللي جوه؟" أما أمي، فكان حلمها مختلف ومناسب لقلبها. أسست عيادات طبية مجانية في المناطق الشعبية اللي الناس فيها مش لاقيه تمن الكشف. كانت دايماً تقول: "الفلوس دي لو فضلت مركونة عندنا ملهاش لازمة، بس بره.. ممكن تنقذ روح." وأنا.. توليت منصب الرئيس التنفيذي. وجهت المجموعة كلها ناحية الاستثمار في مشروعات الطاقة النظيفة والاختراعات الجديدة. والأهم.. إن كل موظف عندي بقى حاسس بآدميته. مفيش حد بيتهان عشان يقبض مرتبه، ومفيش حد بيتعامل على إنه ترس في مكنة ملوش دية. كل سنة، وفي نفس تاريخ يوم الفرح إياه، كنا بنتجمع في بلكونة بيتنا القديم. ماكناش بنحتفل باللي حصل، ولا كنا بنشمت في اللي وقعوا. كنا بنحتفل بالحاجة الوحيدة اللي فضلنا متمسكين بيها بعد العاصفة دي كلها: الكرامة. في ليلة من الليالي دي، الهوا كان هادي، وأمي جابت صينية الشاي بالنعناع وحطتها قدامنا. أبويا كان قاعد على كرسيه الخشب القديم، بقميصه الفلانيل. بصيت حواليا.. البيت بسيط، الشارع هادي. مفيش بودي جاردات، مفيش عربيات فارهة سادة الطريق، مفيش ناس بتتصور معانا عشان تركب التريند. بس كان في حاجة أهم.. كان في سكينة. كان في عيلة عمرها ما باعت نفسها أو دنيتها عشان الفلوس. رفعت عيني للسما، النجوم كانت بتلمع في الليل الصافي. أبويا رفع كوباية الشاي بتاعته، وابتسم ابتسامة راضية وقال: "للصدق.. وللعيلة.. وللشجاعة إن الواحد يفضل واقف على رجله مهما الدنيا رمت عليه طوب." ضحكت من قلبي، وخبطت كوبايتي في كوبايته. أمي ضحكت وقالت: "وأهو شاي النعناع بتاعنا طلع أحسن من أي شمبانيا في الدنيا." ضحكنا كلنا. بصيت لأبويا.. وافتكرت بدلة الفرح اللي كان مأجرها. افتكرت وقعته في البسين، ونظرة شويكار ليه باحتقار كأنه حشرة. وافتكرت اللحظة اللي اكتشفت فيها إن الراجل اللي استقلوه واتريقوا عليه، هو الأساس اللي وقفوا عليه كلهم. بس ساعتها، محستش بالفخر عشان الفلوس، ولا عشان بقينا أصحاب الملايين والشركة والنفوذ.. الفخر الحقيقي كان إن أبويا فضل هو أبويا. فضل عبد الله راجل الورشة البسيط، الشريف، اللي اشتغل بإيده، ولما اتظلم سكت عشان يحمينا، ولما ربنا قدره وخد حقه.. ما استخدمش القوة دي عشان يفترس بيها حد، استخدمها عشان يبني ويصلح. أبويا لاحظ إني سرحانة، فبصلي وقال: "سرحانة في إيه يا ياسمين؟" ابتسمت ورديت: "بفكر إن أغلى حاجة في الدنيا دي طلعت مش الفلوس." سألني باهتمام: "أومال إيه؟" بصيتله هو وأمي بعيون مليانة حب وقلت: "إن الواحد يحط راسه على المخدة بالليل، وينام وهو مرتاح الضمير." ابتسم أبويا، ورفع كوباية الشاي مرة تانية وقال: "صدقتي.. كل حاجة تانية مجرد دوشة كدابة." وفي اللحظة دي، وفي قلب الهدوء ده، فهمت الحقيقة اللي خدت مني سنين وخبطات عشان استوعبها: الثروة الحقيقية مش حساب في البنك بمليارات. الثروة الحقيقية إنك تملك نفسك، إنك تحافظ على كرامتك قدام المغريات والإهانات، وإنك تقدر تبص في عين أهلك من غير ما تحس إنك خذلتهم. الفلوس ممكن تبنيلك قصر.. بس عمرها ما هتشتريلك سقف من راحة البال. والاسم والعيلة ممكن يخلو الناس تخاف منك وتهابك.. بس الأخلاق والكرامة هي اللي بتجبرهم يحترموك. وفي النهاية.. اللي بيفضل من البني آدم مش اللي جمعه وحوشه.. اللي بيفضل بجد، هو الأثر اللي سابه وراه. الكاتبة نرمين عادل همام تمت

مقالات ذات صلة

كتبت كل أملاكي لبناتي ومكنتهم من إدارة شئونها

مش النهارده يا حبيبتي

تنصحوني اعمل ايه

زوجتي_حملت_وأنا_عـ,ـقيم

سمع عمر بن الخطاب رضي الله عنه

اللي تشوفهم بالصورة اطفال عراقيين لم تتجـ,ـاوز اعمارهم ال 17 سنة ارتكبوا فعله بشـ,ـعه وشـ,ـنعيه لن تتصور ان اطفال بهذا العمر يرتكبونه !!

اترك تعليقاً إلغاء الرد