في يوم من الايام
«أنا ما كنتش أعرف إنهم هيعملوا فيك كده! والله ما كنت أعرف!» قمت من مكاني، ووقفت بينها وبين يوسف. «إنتِ هتتكلمي دلوقتي، وهتقولي كل حاجة من الأول للآخر». منى بصتلي، وكان في عينيها خوف وندم، لكن كان فيه حاجة تانية كمان؛ حاجة أقرب لليأس.
قعدت على الكرسي، وبدأت تتكلم بصوت متقطع. «قبل اختفاء يوسف بحوالي شهر، عايدة جتلي البيت. قالتلي إنها اكتشفت إن سامح كان بيزوّر توقيعات في أوراق أرض جدي، وإن فيه فلوس اختفت من حسابات العيلة. قالتلي إنها محتاجة مساعدتي عشان تثبت إن سامح هو اللي كان مسؤول عن كل حاجة، وإنه قبل ما يمـ,ـوت خبّى مستندات ممكن تدمر سمعة العيلة».
كنت واقف مكاني، بسمعها من غير ما أتكلم. «أنا ما صدقتهاش في الأول، لكن عايدة ورّتني صور أوراق، وقالتلي إن فيه مستندات أصلية كانت موجودة في بيت جدي. طلبت مني أساعدها أدور عليها، لأنها كانت خايفة إن حد من العيلة يكتشف الموضوع». سألتها بغضب: «وإيه علاقة يوسف بكل ده؟
«وإنتِ وافقتي؟!» هزت راسها وهي بتعيط. «أنا صدقتها يا أحمد! صدقتها لأنها خالتي، ولأنها طول عمرها كانت بتساعدنا. قالتلي إن الموضوع مش هيطول، وإن يوسف هيرجع في نفس الليلة». «وأنتِ سكتّي؟!» «لأ! أنا حاولت أرجعه! بعد يومين، لما عايدة رفضت تقولي هو فين، روحت لها البيت، وهددتها إني هبلغ الشرطة.
لكنها قالتلي إن لو عملت كده، هتتهمني إني كنت عارفة بالموضوع من الأول، وإن عندها تسجيلات لمكالمات بينا ممكن تورطني». بصيتلها بعدم تصديق. «يعني بدل ما تروحي للشرطة، سيبتي ابني يضيع؟» منى نزلت راسها. «أنا خفت يا أحمد. خفت من الفضيحة، وخفت إنك تعرف إني صدقت كلامها.
وكل يوم كنت بقول لنفسي إن بكرة هقدر أصلح اللي حصل». ضحكت بمرارة. «وبكرة بقى أربعتاشر شهر». منى ما ردتش. «كنتِ بتيجي تشوفيه؟» هزت راسها ببطء. «في الأول، عايدة كانت مخبياه في مكان تاني. بعد شهور، قالتلي إنها نقلته للمكان اللي تحت بيت نسرين، وإنها محتاجة حد يساعدها في الأكل والدواء، لأنها ما كانتش تقدر تروح هناك كل يوم من غير ما حد يشك فيها».
حسيت بالغثيان. «وإنتِ رحتي؟» «أيوه». «كام مرة؟» «مش كتير…» صرخت فيها: «كام مرة يا منى؟!» بكت وقالت: «يمكن خمس أو ست مرات». حطيت إيدي على وشي. خمس أو ست مرات. يعني كانت شايفة ابني محبوس تحت الأرض، وكانت عارفة إنه عايش، وفي نفس الوقت كانت بتقعد جنبي كل ليلة وأنا بعيط على صورته، وتقول لي إنها نفسها يرجع.
